Search
  • A.K Ndungu

Kuri Mutahi wa Kagwe: Haha He Ihuha!

Updated: Sep 5

Cabinet Secretary, Ruhonge rwa Ugima wa Mwiri

Thirikari-ini ya Kenya



Bwana CS,


Amukira ngeithi ciakwa cia mwanya, na cia njamba njithi kuma mitambo ini ya umemerekia ya urumwe, kana "social media."


Njoke ngucokerie ngatho ciakwa cia mwanya, niundu wa wira uria ukoretwo ukiruta, wi ta Cabinet Secretary wa ruhonge rwa ugima wa mwiri.


Wira uyu wakugüïrïire, oriria bururi wahobanirio ni murimu wa Korona. Ni ma oo mundu ari wira wake, na wira mundu gutiri ungi ungiuruta. Riri ni ihinda riaku!


Bwana CS, Kuma nii ndimenye, ndi ta Mugikuyu karing'a, mwana wa kahii wa baba Ndungú na maitu Wanjiku, ndanaigua ng'ano.


Ng'ano, cia aciari gutigira ciana ciao kirumi.

No ndiri ndetikia, kana ngetikira, ati muciiari no aciare mwana wake, amurere, amuthuthire, amuhihe mai, na acoke amutigire kirumi!


Na, nikio ngoretwo ndina kieha kiingi muno ngoroini, kuma njigue miario yaku iria watangathire kuri njamba njithi, muthenya wa kana, mweri wa kana, mwaka ini uyu wa ngiri igiri na mirongo iri.


Mutongoria, Kwina miario miingi ikoretwo ikiario, iguru ria murimu uyu wa Korona.

No we ni ukoretwo na wïigiririki munene muno, wa gutariria muingi, uria tugukorwo tukihurana mbara na murimu-uyu.


Kireke nguririkanie miario iria yaumire kanua-ini gaku muthenya wa Jumaa, mweri inya, wa kana

ati inyui andu ethi, niinyui mugekora mutari na aciari, mawira, kana bururi. Mukainukagira ciana cianyu, mutari na giakuria. Mugututhika, turi aciari anyu, na mututhike turi aingi. Tumutige na tumutigire bururi, utari ona ndururu kana ciringi.

Ngakiiyuria, ii hihi ni kirumi watutigira, orouguo tari itheru? Kana hihi ni nii ndiraigua maundu makwa?


Nii ndïtaraga ta njamba njithi, ndina miaka ihingite mirongo itatu na iri, na ndi ithe wa ciiku, maitu wa bururi. Ni kieha muno kuona ati ngina njiarwa ici ciitu, onacio niwaciïtaniria kirumi ini giki. Ati ithui ta aciari aao tutikona mawira.


Ngakiiyuria, angikorwo niguo ri, tikaba tugithame tugatuike ngombo kungi? No ngacooka ngauga cha! Tutingicoka Misri, tondu küu onanikuo gikorora kiihite!

Ngeyuria, kana njamba tucookie miting'oe nyunjuri, tucooke marima, twetere murimu uhetuke? Ningi ngoro ikanjira chaa!


Tondu ni kaba gukua ni murimu gukira ng'aragu!


Awa,

Kirumi na kironda, ni undu umwe. Naguo murimu na mutino no kindu kimwe, tondu gutiri wiyendagira. Miario nayo ni dawa. Miario noihonie, kana yurage ngoro. Nikio turabatara kwaria, na twarie wega. Twarie na tuthikaniririe. Tuiguane na tuiguithanie.


Nacio ngeithi ni miario! Na gutiri mundu uui bata wa ngeithi, ta ithui mbari ya nyakairu! Gwi gugikinya handu, ati ngeithi noitüme mundu agwate murimu, nitwagiriire gwicurania ria keri, tutanatumura kanua kana guoko.


Nihari bata tuiguane atiriri, ati angikorwo nitukwaria, nonginya twarie ma! Tondu ma ni kihoto. Kireke nguririkanie ati, Gikuyu niogire na akiuga wega, "mutino nduri njamba."

Kwi hindi ya itheru, na hindi ya kahindi meruka!


Awa niui wega, ati bururi ni wa Njamba, Gitonga na Muthamaki. Nario riri ni ihinda ria njamba kugitira bururi. Tondu bururi niurabatara hinya wa mashoka, Mashoka ma mahüri, ngoro na meciiria.


Ni ma ati Korona ni thü iranina andu. No ona ïri thü, Korona ndingituma iguru na thi inyitane. Tondu ona kiura gitingigiria ng'ombe inyue maï. Naguo bururi uyu witu, no ugüthii na mbere kuri Korona kana gutari. Ona hindi ya Nuhu, kuri aria mahonokeire, na magiciara njiarwa ikiihura thi ng'ima.


Bururi uyu ni witu. No bado turi kenyu kanini muno gat hi ng’ima! Twagiriire tunyitane na mabururi maria mangi ma continent ya Afrika, tondu twi hamwe, niithui mbeu njithi ya thi ng’ima!


Uguo ni kuuga ati, ona murimu uyu ungihotomera thi ng'ima, ota üria murimu wa Spanish Flu wahobaniirie thi miaka na 1914 nginya 1918, continent ya Afrika, niyo igutuika gitugi kia ruciaro ruria rukagwata thi ng'ima. Tondu withi, ni kirathimo!


Nitwagiririire gukorwo tukihe andu aitu umiriria na mwihoko. To hindi ciothe no mbara ya kanua, iria itumaga andu memene na meyagire kiene. Nii ninjui nangamenya wega, Ngai ateithagia witeithitie, na gutiri wendaga uteyendete!


Thutha wa Korona, wira wa kuhunia thï ng'ima ugucooka mwena wa Afrika. Urimi ugie bata, biashara ithereme, mawira maingihe, mbeca baribari!


Awa, ndigükïria hau.


Njitagwo Kagunda wa Ndungu, na Ndiri Mutwe Mwega.


3 views

©2020 by ndungu.report.